LAOAG CITY – Kalikagom ni Mayor Aldrin Garvida iti ili ti Nueva Era nga adda ti maestablisar a dormitoryo iti ciudad ti Batac ken Laoag para kadagiti estudyante a residente iti nasao nga ili.
Segun kenkuana, maysa kadagiti problema dagiti nagannak ti pagkaseraan dagiti annak da nga agad-adal iti ciudad.
Ngem kunana a kadagitoy a gundaway nga awan pay ti naipatakder a pagkaseraan ket ipaayda pay laeng ti pagbayad dagiti estudyante iti kasera da no sadinno a ti ipaay da a gatad ket manipud iti sweldoda iti asawa na a ni Vice Mayor Caroline Garvida.
Nu pay kasta, mangnamnama ti Mayor a patgan ti Commission on Audit (COA) ti kalikagomanda a pannakaipasdek ti kasera dagiti estudyante manipud iti nasao nga ili.
Naammuan nga immunan a kiniddawda iti opisina ni Pres. Ferdinand Marcos Jr. daytoy ken natratar pay daytoyen kadagiti nagduduma nga departamento iti nasao nga ili.
Kabayatanna, mangnamnama ni Mayor Garvida a pumintas pay ti masakbayan dagiti estudyante ken maipaayan da pay ti kanayunan a suporta.
Napalaos met ti panagyaman dagiti estudyante ken dagiti nagannak iti Mayor gapu ta dakkel daytoy a tulong kadakuada.
