LAOAG CITY – Inbatad ni Mayor Joseph de Lara iti ili ti Solsona a kalikagom da a biagen manen ti vermiculture iti komunidad gapu ta daytoy ket maysa a livelihood program a maipaay kadagiti umili babaen ti panagtaraken kadagiti alinta a ma-convert iti organic waste agingga nga agbalin daytoy a vermicompost.
Kuna ti mayor a mangiyalokar da iti pondo para iti daytoy a programa tapno usaren a paggatang kadagiti alinta a mausar a puunan dagiti bumarangay.
Inbatad na nga iti kada barangay ket ipaayan na iti pagrugian da a lima a kilo ti alinta.
Innayon ti mayor a napintas daytoy gapu ta ti laeng mausar a kanen dagiti alinta ket dagiti bulbulong ti nateng wenno mulmula, kasta pay dagiti basura.
Inrakurak na a babaen iti vermiculture ket makatulong pay a madalusan iti aglawlaw gapu ta mabalin a biodegradable a basura ti mausar.
Kabayatanna, inbatad ni de Lara a mayat pay a pagmulaan daytoy gapu ta organic.
Ti vermiculture program iti ili ti Solsona ket nangrugi idi tawen 2013.
