LAOAG CITY – Kinontra ni Mayor Mike Hernando iti ili ti San Nicolas ti nairakurak ni Congressman Angelo Marcos-Barba nga arigna awanen ti kwarta iti kaha ti lokal a gobierno iti nasao nga ili.
Nadakamat daytoy ti kongresista kabayatan ti interview kenkuana no sadinno a nairakurak na ti possible a pannakaiyakar ti munisipyo ti ili ti San Nicolas gapu ta saan a napintas ti lokasyon na, ngem kuna na a dakkel a kantidad ti magastos.
Inlawlawag ni Mayor Hernando nga iti audit ti accounting office a naisumitir iti Commission on Audit agingga idi Mayo 31 ita a tawen ket adda ti nasurok a 352-milyon a balanse iti nagduduma nga accounts iti gobierno lokal ili ti San Nicolas.
Kuna na a mangipaneknek daytoy a nakapondo ti kwarta da iti bangko ken saan a napukaw iti babaen ti administrasyon na.
Kabayatanna, inadmitir ti mayor nga iti pondo ti gobierno lokal ti nangalaan da iti inggatang da ti lote para iti pakaipatakderan ti baro a munisipyo ti ili ti San Nicolas.
Nupay kasta, inpasigurado na saan a makaapektar daytoy iti operasyon para iti pagsayaatan ti nadakamat nga ili gapu ta ado ti pondo da.
