LAOAG CITY – Nagkedked a mangipaay ti naananay a komento ni Mayor Micheal Marcos Keon seknan ti kalikagum ti Aboitiz group a mangipasdek ti Solar Farm iti Brgy. Talingaan ditoy siudad ti Laoag.
Daytoy ket kalpasan nga inrakurak ni Sangguniang Panlungsod Member Bryan Alcid a saan a kayat ti kaaduan a posible a pangipasdekan ti Solar Farm iti nadakamat a lugar.
Nupay kasta, inpasigurado ti mayor nga amin dagitoy ket tratarenna inton ag State of City Address-na kagiddan ti panagselebrar ti panagkasangayna inton Setiembre 21, 2024.
Kabayatanna, awawisen ni Sangguniang Panlungsod Member Bryan Alcid dagiti kakaduana a konsehal a mapanda kitaen ti pangipasdekan ti Aboitiz Group ti Solar Farm nga addaan ti 114 hectres ti kalawana iti Brgy. Talingaan ditoy siudad ti Laoag.
Daytoy ket kalpasan nga adda ti maipalpalapayag nga impormasion nga ipatagda ti Sand Dunes banag a saan kayat ti kaaduan.
Nupay kasta, kinuna ni Vice Mayor Rey Carlos Fariñas a kasapulan ti ocular inspection nga ummuna sakbay a mapalubusan dagitoy ken suretenda ti inisial a napagtutuludan a saan a madadael ti Sand Dunes.
