LAOAG CITY – Naalaw dagiti sumagmamano a mangngalap ti maysa a butanding iti kabaybayan iti Brgy. Pasaleng iti ili ti Pagudpud.
Segun ken ni Brgy. Kagawad Arnel Aluag iti nasao a barangay, kabayatan ti panagkalap dagiti kabarangayanna a mangngalap ket saanda a ninamnama nga apaman nga isang-atda ti sigay dagitoy ket nakigtotda a nairaman metten a naalawda ti butanding.
Inbatadna nga agarup 20 a kadapan ti kadakkel ti butanding a naalaw dagiti maseknan a mangngalap.
Kunana a dagusda met laeng a pinaruk-atan ti butanding no sadinno ket awan met ti aniaman a sinagabana a sugat ken adda iti nasayaat a kondision daytoy.
Inlawlawagna a daytoyen ti maikadua a gundaway ita a bulan ti Agosto nga adda ti naalaw dagiti mangngalap a butanding.
Kabayatanna, inpakaammo ni Brgy. Kagawad Aluag a kankanayon ti pakdaarda kadagiti residente maipanggep iti saanda a panangdangran kadagiti butanding no bilang makakita wenno makaalawda kabayatan ti panagkalapda.
