LAOAG CITY – Nakumpiskar dagiti kameng ti Philippine National Police iti ili ti Banna ti maysa nga Springfield Armory, Model 1911-A1, Cal. 45 Pistol nga addaan Serial Number iti uneg ti Nissan Navarra nga agmaris ti puraw a nakadungpar iti maysa a kotse a Toyota Altis a nakaparking iti igid ti kalsada kangrunaan na iti sangawanan ti pagtaengan ni Mr. Van Edrich Acuña y Saclayan, agtawen ti 26, residente iti Brgy. Valenciano iti ili ti Banna.
Iti imbestigasyon ti Philippine National Police, nabigbig ti nagmaneho ti Nissan Navarra a ni Mark Owen Ramos, residente iti Brgy. Ar-arusip iti ili ti Badoc idinto a ti nadungpar na a kotse ket kukua ni Mr. Acuña.
Naamoan a gapu iti napasamak ket nakuppit ti likod ti kotse ken nagtalapwagaw met a dagus ti Nissan Navarra kalpasan iti insidente.
Nupay kasta, iti inwayat nga hot pursuit operation dagiti otoridad ket nasarakan da ti Nissan iti asideg ti pagtaengan ni Pedro Manilag y Camangeg iti Brgy. Catagtaguen iti ili ti Banna ngem awanen ti driver a ni Ramos.
Iti panagsukisok dagiti otoridad iti uneg ti Nissan Navarra ket ditoy a nakita da ti maysa a caliber 45.
Agpapan maisursurat daytoy a damag ket agtultuloy pay laeng ti hot pursuit operation ti nailian a pulisya kontra ken ni Ramos.
