LAOAG CITY – Nagpakamatay ti maysa a construction worker a residente iti ili ti Brgy. Lanao iti ili ti Bangui gapu iti ayat.
Segun ken ni P/Cpt Marlon Lorenzo, hepe ti Philippine National Police iti ili ti nadakamat nga ili ti biktima ket nakita a nakabitin iti kayo nga usar ti tali iti lugar nga in-post na online.
Kunana nga iti panangtingitingda ket arigna a makurkurangan ti biktima iti atension nga ipapaay ti nobiana basar kadagiti conversation-da nangruna ta oras ti mapalabas sakbay nga agreply ti babai.
Naammoan a ti naudi nagsaritaanda ket ti panagkiddaw ti biktima a tumawag iti nobiana.
Malaksid iti daytoy, nakitada pay ti ladawan iti cellphone ti biktima nga aglulua.
Mainaig iti daytoy, maysa nga aldaw sakbayna a kinettel ti biagna ket adda ti inbilinna kadagiti miembro ti pamiliana a kitaen ken aywananda ti inana.
Inlawlawagna a saan met nga inapagarup ti pamilia ti biktima nga agpakamatay gapu ta awan dagiti ipakpakitana a senyles nga aramidenna daytoy a banag.
Kabayatanna, immapala ni Lorenzo iti publiko a saan a sayangen ti bukod a biag gapu iti nagduduma a problema.
