LAOAG CITY – Kinumpirmaran ni Department of the Interior and Local Government (DILG) Secretary Jonvic Remulla a maysa a Pilipino ti karaman kadagiti natay iti napasamak a collision ti maysa nga American passenger jet ken United States military helicopter nga asideg iti Reagan airport idiay Amerika idi rabii ti Mierkoles, Enero 29.
Kinumpirmaran met ti Philippine National Police ti pakabigbigan ti natay a Pilipino iti insidente.
Inrakurak ni Philippine National Police Spokesperson Lt. Col. Randulf Tuano a ti pimmusay a Pilipino ket ni Philippine National Police Chief of Supply Management Division P/Col. Pergentino Malabed Jr. nga adda iti official travel para iti pre-delivery inspection ti sumurok dua a ribu nga units ti all-purpose vests.
Awan pay ti inparuk-at a rakurak wenno kumpirmasion ti Embahada ti Pilipinas iti Washington D.C. maipanggep iti pannakatay ti maysa a Pilipino.
Immunan a kinumpirmaran ni United States President Donald Trump ita nga aldaw nga awan ti survivor wenno natay amin dagiti 67 a tattao a nakalugan.
Kabayatanna, daytoy ket maibilang a deadliest United States air disaster iti uneg ti 20 a tawen.
