LAOAG CITY – Nagdinnungpar ti maysa a kurong-kurong ken wave 100 iti paset ti Bonifacio Street Brgy.16 San Jacinto partikular iti likud ti mercado publiko ditoy siudad ti Laoag.
Ti kurong-kurong ket inmaneho ti maysa a lalaki nga agtawen ti 18, awanan asawa, awanan ti driver’s license, ken residente iti Barangay 54-B Camangaan iti isu met laeng a siudad.
Addaan daytoy ti dua a pasaheros nga agpada nga agtawen ti 19 ken agpapada a residente iti nasao a barangay ken siudad.
Idinto a ti wave 100 ket inmaneho ti maysa a lalaki nga agtawen ti 26, addaan ti professional driver’s license, ken agpada a residente ti nasao a lugar.
Segun ken ni PMS Eric Bumagat, mangidaulo ti Philippine National Police (PNP) Traffic Division iti siudad nga agpada a dumaldalyasat dagiti dua a lugan iti agsumbangir a direksion ti nasao a kalsada no sadinno a ti kurong-kurong ket agturong nga agpalaud ken agpadaya met iti Wave 100.
Apaman nga agsabat dagitoy, kellaat nga inagaw ti kurong-kurong ti linya ti Wave 100 a nagresultaan ti panagdinnungparda.
Gapu iti daytoy, nagsagaba dagiti nagmaneho ken pasaheros da ti sugat iti nagduduma a paset ti bagbagida nga insigida met a naitaray iti Governor Roque B Ablan Sr. Memorial Hospital para iti naan-anay a pannakatamingda.
