LAOAG CITY – Maysa a lalaki ti nakalasat ti pammaltog kalpasan a nagbalin a kasla anting-anting ti silver necklace nga suot na idiay Colorado, Estados Unidos.
Daytoy ket kalpasan a timmama ti bala iti kuwintasna a tumama kuma iti tengngedna.
Basar iti Commerce City Police Department, makita iti retrato ti maysa a silver a kuwintas a naabbungotan iti dara no sadinno a nakabaon pay laeng ti bassit a pedaso ti bala a manipud iti paltog.
Segun kadagiti otoridad, no saan a natamaan ti bala ti kuwintas, agbalin a fatal ti mapasar ti biktima manipud iti pammaltog.
Kabayatanna, idi sinukimat dagiti otoridad ti kuwintas, natakuatan a saan a pudno daytoy a silver no di ket posible a naaramid gapu iti natangtangken nga alloy.
