LAOAG CITY – Napilaanen ti kaso a Direct Assault at Resistance and Disobedience to a Person in Authority ti maysa a lalaki kalpasan a nagpungtot ken saan na a nirespetar dagiti polis iti ili ti Bacarra.
Segun ken ni P/Lt/Col. Roldan Suitos, Chief of Police iti Bacarra Municipal Police Station ti suspek ket adda ti umno a tawen ken residente iti Brgy 3 San Andres II iti nasao nga ili.
Basar iti imbestigasion, agarup alas 11:15 ti rabii idi Disiembre 26, nakaawat ti tawag ni P/S/Sg. Hector Andrei Garcia Jr., ken P/Cpl. Nathaniel Ramos Lumang, mainaig iti gulo a napasamak iti sango ti maysa a Resto Bar iti Brgy. 17 iti nadakamat nga ili.
Segun kenkuana, idi makasangpet dagiti otoridad iti nasao a lugar kinasarita da dagiti empleado ti nasao a bar ket nakitada ti nobia ti suspek nga umininom iti nasao a bar.
Mainaig iti daytoy, simmangpet ti kabsat a babai ti suspek iti nasao lugar tapno kumprontaren ti nobia ti suspek, idinto a tinawagan ti babai ti kabsat na a suspek nga adda iti eastern portion ti bar.
Idi nakisarita dagiti polis iti suspek ket nagbalin nga agresibo daytoy ken saan na a sinurot dagiti pammilin ti otoridad.
Gapu iti daytoy, pinadas dagiti polis a tiliwen ti suspek ngem apamana nga inarestar dagiti otoridad ti suspek ket pinagsaw-an na daytoy iti agkakadakes ken limmaban daytoy rason a naperdi ti reflectorized traffic vest ti maysa kadagiti otoridad.
Kabayatanna, naitaray ti suspek iti Bacarra Municipal Health Office para iti medical examination ken iti Bacarra Police Station para iti proper disposition.
