LAOAG CITY – Nagballigi dagiti otoridad a nangarestar iti maysa a mannalon a lalaki iti naisayangkat a search operation iti Barangay 35, Pipias iti ili ti Bacarra.
Naarestar ti suspek nga agtawen 36, naasawaan, ken residente iti nasao met laeng nga ili babaen ti bileg ti search warrant gapu iti maipagarop a panagikot na ti paltog.
Iti panagsukimat dagiti otoridad iti balay a banbantayan ti suspek ket nakumpiskar ti maysa a Brown Gun Bag, 1 a caliber 9MM rifle, 1 a red gun box, maysa a Glock 23 Gen 4 nga addaan ti flashlight ken magazine nga addaan ti 10 live ammunitions iti unegna, 1 caliber 9MM, maysa a Caliber 22 rifle, dua a magazine, maysa a Caliber 9mm rifle, 1 a red gun box, 1 a caliber 9mm, ken nagduduma pay a ramit ti paltog.
Inbatad ni Police Capt. Tolentino Erum Jr., ti chief of police iti ili ti Bacarra, nga awan ti naipakita ti suspek a dokumento ken naduktalan a saan a nakarehistro dagiti paltog nga ik-ikutan ti suspek.
Inlawlawag na nga adda ti immuna a naawat da a report a ti nasao a suspek ket ipakpakita na ti paltog na isut gapuna nga inberipikar da daytoy no sadinno nga idi napaneknekan da ket nagaplikar da a dagus ti search warrant a maiserbi kontra kenkuana.
Innayon na nga isagsagana dan ti ipila da a kaso a panaglabsing ti Republic Act 10591 wenno ti Comprehensive Law on Firearms & Ammunition Regulation Act kontra iti nasao a suspek.
Iti agdama, nagtalinaed ti suspek iti Philippine National Police iti ili ti Bacarra.
