LAOAG CITY – Naminpinsan a nalikyab ti diding ti maysa a pagtaengan iti Brgy. 29, Sto. Tomas ditoy ciudad ti Laoag.
Daytoy ket kalpasan a nasapgud ti mapapati a maysa a 10 wheeler truck iti nakaimuntaran ti kable ti kuryenteda.
Segun kenni Mr. Donald Nicolas, pumarbangunen idi mapuotan na ti napigsa a panagtupak iti ruar ti pagtaenganda rason nga insigida a napan iti maikadua a kadsaaran tapno kitaen na ti naggappuan iti tagari.
Ditoyna a naimatangan ti nalikyab a diding ti pagtaenganda a naaramid ti plywood gapu iti nakaranranniag a nakita na.
Gapu iti daytoy, nagpanawagan ni Nicolas a tulongan da para iti pannakaiplastar ti didingda.
Naamuan a sipod itay parbangon ita nga aldaw ket saan pay naisubli ti serbisio ti kuryenteda gapu iti nasao a pasamak.
