LAOAG CITY – Natakawan ti maysa kadagiti aglaklako ti tsinelas iti merkado publiko iti ili ti Bacarra.
Ti suspek ket maysa a menor de edad nga agtawen ti 13 ken rumrummuar a residente ti Barangay Buyon iti nasao nga ili.
Segun ken ni Mr. Michael Agarpao Pablo, agbanbantay iti nasao a pasdek negosio, kellaat daytoy a nakariing iti agarup ala una ti parbangon kalpasan a nakitana ti maysa a menor de edad a nakatakder iti paglakoanda a nakaiggem daytoy ti kutsilyo.
Inbatadna a ginandatna nga agawen ti kutsilyo manipud iti suspek isut gapuna a natengngelna ti menor de edad.
Inlawlawagna a saan laeng a maysa nga indibidual ti simrek iti puestoda no diket adda pay ti uppat a kadua ti suspek ngem nakalibas dagitoy.
Kunana a naitaray dagiti kadua ti suspek dagiti tinakawda a nagduduma a klase ti tsinelas a mapatta-patta nga agbalor ti sumurok tallo ribu a pisos.
Mainaig iti daytoy, insigida a nagkamang ni Pablo iti Bacarra Municipal Police Station kaduana ti maysa kadagiti suspek tapno mapatawan ti maiyannatop a pannusa.
Nupay kasta, saan a mabalin a maibalud ti suspek gapu ta menor de edad daytoy isut gapuna a nairekomendar a maikabil daytoy iti babaen ti Municipal Social Welfare and Development Office para iti naan-anay a pannakabayabayna.
Kabayatanna, inpakaammo ni Barangay Chairman Abraham Acoba Jr., ti Barangay Buyon iti ili ti Bacarra nga awan pay ti dimmanon a report kadakuada manipud iti Bacarra Municipal Police Station mainaig iti nasao nga insidente.
Inadmitirna nga adda ti sumagmamano nga insidente ti panagtatakaw iti kallabes iti barangayda a nakairamanan ti tallo a menor de edad a dua nga estudiante ken maysa nga out-of-school youth.
Innayonna a naiget ti panangipatungpalda ti curfew hours iti barangayda a mangrugi iti oras ti alas-10 ti rabii.
