LAOAG CITY – Kinumpirmaran ti Department of Foreign Affairs (DFA) ti pannakatay ti maysa a pinay idiay Israel kalpasan a natamaan ti missile attack iti siudad ti Haifa, Israel idi Domingo, Abril 5.
Iti official statement, inrakurak ti Department of Foreign Affairs ti pannakipagladingit da iti pamilya ti pimmusay a pinay idiay Israel.
Basar iti report, karaman pay a pimmusay ket ti asawa ti pinay a maysa nga Israeli ken dagiti katugangan na.
Segun iti departamento, dagus a nakikoordinar ti Philippine Embassy iti Tel Aviv kadagiti kabagian ti biktima ditoy Pilipinas tapno ipakaammo da ti insidente ken siguraduen ti pannakaipaay ti naan-anay a tulong, karaman ti pannakaiyawid ti bangkay ti pinay iti baet ti tension iti rehiyon.
Inpasigurado pay ti Department of Foreign Affairs nga agtultuloy ti panangipaay da iti suporta iti pamilia, pakairamanan ti pinansial ken dadduma pay a klase ti tulong, kagiddan ti panagpanawagan ti ahensya iti kararag para iti pannakaisaknap ti kapia ken kinatalged dagiti Pilipino iti Israel.
