LAOAG CITY – Maladingitan ni Mrs. Vivian Deliosario iti ipupusay ti kaddua na iti pammati no sadinno a nakita na laengen daytoy nga awanan biag ken nakabitin iti kuarto na.
Nabigbig ti biktima nga agtawen iti 63, bioda, awanan anak ken tubo iti Barangay Estacia iti ili ti Piddig ngem agnanaed daytoy iti Barangay 2 Sta. Joaquina ditoy ciudad ti Laoag.
Segun ken ni Deliosario, saan na nga ekspektaren a maaramid ti biktima daytoy gapu ta natalged met pay laeng a nakasarsarita na daytoy sakbay a kineltay na ti biag na.
Naamuan a ti biktima ket adda kakabsat na iti ili ti Piddig, Marcos ken iti ili ti Badoc.
Basar iti inisyal nga imbestigasyon, ti biktima ket nagusar iti tali nga isu ti inputipot na iti tenged na.
Mainaig iti daytoy ket impakaammo met ni Barangay Captain Dan Tolodanes iti nadakamat a barangay a ti biktima ket agsagsagaba iti depresyon, no sadinno nga agsagsagaba daytoy iti maysa a sakit a maawawagan ti Trigeminal neuralgia, maysa a sakit ti ulo a ramanen ti panagsakit ti ngipen ken panga na.
