LAOAG CITY – Naipaiman iti Laoag City Government ti maysa a van nga aggapu iti national government.
Segun ken ni Mayor James Bryan Alcid, daytoy ket dakkel a nayon a tulong nga usaren ti lokal a gobierno iti panangipadanon kadagiti nagduduma a serbisio kadagiti umili.
Inbatadna a daytoy ti resulta iti pannakagun-od ti lokal a gobierno ti Seal of Good Local Governance (SGLG) Incentive Fund a programa ti Department of the Interior and Local Government.
Kunana a ti nasao a lugan ti testamento ti napintas ken naannayas a serbisio ti lokal a gobierno kadagiti umili.
Inpanamnamana nga agtultuloy ti alisto ken napipintas a serbisio ken programa para iti pagsayaatan dagiti residente ditoy siudad.
Naammoan a karaman kadagiti nakaimatang iti pannakabendision ti nasao a van ket dagiti department heads ken dagiti sumagmamano a kameng ti Sangguniang Panlungsod ditoy siudad ti Laoag.
