LAOAG CITY – Nadismaya ni Ms. Mhariz Tabrilla, Brgy. Puttao iti ili ti Solsona kalpasan a naikkat ti nagan ti asawana a ni Mr. Aristotle Tabrilla iti listaan kas maysa kadagiti benepisiario ti Ayuda sa Kapos ang Kita Program wenno AKAP ni Pres. Ferdinand Bongbong Marcos Jr.
Segun kenkuana, adda ti naawatna nga impormasion nga adda ti maipaay a cash assistance para kadagiti tricycle drivers rason nga inkagumaanda a mapan iti Municipal Social Welfare and Development Office tapno ag-fill out ti form.
Nupay kasta, inpalgakna a kalpasan ti sumagmamano nga aldaw ket adda ti timmawag kenkuana manipud iti nasao a pangopisinaan a naikkat iti listaan ti nagan ti asawana.
Inlawlawagna a basar iti timmawag kenkuana ket inikkat ni Mayor Joseph De Lara ti nagan ti asawana gapu ta maipagarup nga agkomkomento daytoy ken friend-na ti dummy account nga Akron Hammer.
Gapu iti daytoy, kuna ni Mhariz a masdaaw ken maluksaw isuna iti napasamak iti asawana nangruna ket awan ti nalawag a rason ti panangikkat ti Mayor ti nagan ti asawana iti listaan.
Mainaig iti daytoy, inadmitirna nga agkomkomento isuna iti dummy account nga Akron Hammer ngem inpettengna a saan daytoy nga agkomkomento a pammerperdi iti babaen ti administrasion De Lara.
Naammoan nga adda dagiti sumagmamano a benepisiario iti Ayuda sa Kapos ang Kita Program a maipagarup nga agkomkomento met laeng iti nasao a dummy account ngem napanda nagpakawan ken ni Mayor De Lara isu a nairamanda iti listaan ken nakaawatda ti cash assistance.
Kabayatanna, naiget a naglikudan ni Mayor De Lara ti alegasion kontra kenkuana ken kunana nga adda ti naiget a pagalagadan a sursuruten ti Municipal Social Welfare and Development Office maipanggep iti nasao a programa.
