LAOAG CITY – Kinumpirmaran ni Police Major Rommel Ramos, chief of police ti ili a Bacarra a pimmusayen ti maysa kadagiti biktima ti desgrasya iti paset ti Brgy. 10, San Vicente iti nasao nga ili.
Nabigbig daytoy a ni Gerald Tolentino, agtawen ti 24 ken residente ti Brgy. 14, Binsang iti ili a Pasuquin.
Segun kenni Ramos, pimmusay ni Tolentino gapo iti multiple organ failure, intracranial injury, ken multiple physical injuries.
Inbatad ni Ramos a ni Tolentino ket isu ti nakalubbon iti motorsiklo nga inturong ni Jerome Constantino, agtawen ti 19, awanan asawa ken residente ti Brgy. 32, Corocor iti nasao met laeng nga ili.
Naamoan a ni Constantino ket naiyakar met iti Mariano Marcos Memorial Hospital and Medical Center iti ciudad ti Batac.
Maipalagip a bayat nga agturturong iti laud a direksyon dagiti biktima ket naawanan ti preno ti motorsiklo a nagluganan da a nangitunda ti pannakaidungpar da ti poste ti kuryente.
