LAOAG CITY – Arig na saan pay a nagsink-in kenni Dr. Ian Greg Tapac, residente iti Barangay 55-A, Barit ditoy ciudad ti Laoag a pimmasa iti Physician Licensure Examination.
Segun kenni Tapac, ado dagiti karit a sinango na kabayatan ti panagreview agingga iti eksaminasyon.
Kunana a saan na a mailadawan ti kinaragsak na nangruna ket ado dagiti pannubok sakbay ti panagballigi na.
Inlawlawag na nga inpadamag laeng kenkuana ti pagayam na met laeng a doktor a nakapasa iti nasao nga eksaminasyon.
Dinakamat na a kalpasan ti pannakaammo na a nakapasa ket napan na binisita ti tanem ti pimmusay a lola na nga isu ti nangkadkadua kenkuana sipud ubing.
Mainaig iti daytoy, kuna ni Dr. Tapac a maysa kadagiti kangrunaan nga inaramid na malaksid iti panangigaged iti panagreview ket ti saan na a panangipalubos a mapukaw ti self-confidence na.
Naamoan a ti ummuna nga arapaap na ket agbalin a veterinarian ngem ginutigot isuna ti pamilya na a mangala iti Doctor of Medicine.
Inbatad ni Dr. Tapac a ti plano na ket agbalin nga OB-GYN ken agserbi kadagiti Ilokano.
Kabayatanna, dagiti nageksamin manipud iti Mariano Marcos State University ket nakapasa amin ken daytoyen ti maikapat a tawen a nagsasaruno a 100 % a nakapasa ti Universidad.
