LAOAG CITY – Kinumpirmaran dagiti sumagmamano a residente iti Bagumbayan-Samonte St. iti Barangay 9 ditoy ciudad ti Laoag nga adda ti ubing a naregreg idi kalman, Pebrero 7 iti matartarimaan a kanal.
Segun kadagitoy, ti agamak da gapo ta amangan no maulit ti napasamak nga adda ti maregreg nga ubing nangruna no mabayag pay a malpas ti pannakatarimaan ti kanal.
Rumrumwar a saan pay a nalpas ti kanal gapo ta maipagarop nga agkurang ti pondo iti daytoy.
Naamoan nga iti akin-amyanan pay laeng a paset ti kanal ti makalubon iti sumarsaruno nga aldaw.
Nupay kasta, inpetteng met dagiti residente a no kuma saan a sigurado a maileppas a dagus ti kanal ket saan kuma a nabakbak amin ti paset daytoy.
Kabayatanna, kuna met ti kapitan ti Barangay 9 a ti akin-proyekto daytoy ket ti lokal a gobierno ditoy ciudad ti Laoag
Kuna met ni City Engr. Manuel Aurelio iti Engineering Office a kinasarita nan ti contractor iti proyekto a ni Barangay Chairman Ruben Roque iti Barangay Nalbo ditoy ciudad.
Kalpasan daytoy ket inbilin na iti daytoy a mapan da kitaen ken urnusen da ti proyekto no sadinno a mangipan daytoy ti napinpintas a rangtay dagiti tattao a mapan iti pagtaengan da tapno saanen a maulit ti napasamak.
Inpetteng na pay a saan a pudno a kurang ti pondo ti proyekto ngem saan kuma laeng a namnaminsan a natubtub ti kalob ti kanal tapno saan nga agsagaba dagiti lumugar.
Mainaig iti daytoy, naamoan ti Bombo Radyo a ti maipagarop a nagkiddaw iti daytoy a proyekto ket ni Sang. Panlungsod Member Jason Perera para kadagiti residente.
Ikarkarigatan met ti Bombo Radyo a malaan ti komento ni Perera mainaig iti daytoy.
