LAOAG CITY – Natay ti maysa nga ubing nga agtawen ti lima kalpasan a maipagarup a nabaybay-an dagiti doktor iti Laoag City General Hospital (LCGH).
Segun kenni Mr. Ar Jay Orro, ama ti ubing, intaray da ti anak na iti umuna a lawas ti Abril ken nakita ti sakit na a gastritis rason a napaawid met laeng ti pasyente.
Kuna na a kalpasan ti sumagmamano nga aldaw ket kimmaro iti panagsakit ti ubing manipud iti immuna a pannakaitaray na iti ospital.
Mainaig iti daytoy, inbatad ti ama nga idi Abril 21 a panangitaray da manen ti anak da gapu ta nagebbal ti rupa na ken marigatan nga umanges ken dimmakkel pay ti buksit na.
Inbatad na adda ti intudok da nga agas para iti panagebbal ti ubing ngem saan a nakita ti ospital iti panagrigat ti panaganges ti ubing.
Kunana a naidalan iti amin a klase ti eksaminasyon ken nasayaat ti nagbalin a resulta ken nairekomendar ti idadalan ti ubing iti x-ray idi Abril 26.
Nasakit ti nakem ni Orro gapu ta rimwar ti ubing idi Abril 27 ken naladaw pay a naiparuk-at ti resulta ti x-ray nga immabot iti dua nga aldaw.
Innayon na nga idi naitaray iti ospital idiay ciudad ti Batac ket insegida a nakita da ti sitwasyon ti ubing ken naduktalan a dimmakkel ti puso na ken nagdanum ti bara na a puun ti nakatayan ti ubing idi Domingo
Iti nakita ti doktor idiay siudad ti Batac ket Hospital a sinagaba ti ubing ket ti acquired pneumonia, congenital heart disease, ken anemia secondary.
Kabayatanna, iti biang ti LCGH ket isayangkat da iti imbestigasyon seknan iti kaso ti ubing babaen ti mabukel a komite ken no maamoan da ti resulta ket isu ti panagsarita ni Dr. Biboy Dacuycuy, ti nangtaming iti pimmusay nga ubing.
