LAOAG CITY – Inpasigurado ti Municipal Environment and Natural Resource Office iti ili ti Dingras, a solbaren da ti mapaspasaran a parikut a sangsanguen dagiti sumagmamano a residente iti Brgy. Suyo iti nasao nga ili.
Daytoy ket kalpasan nga agsaksakit dagiti iti Brgy. Suyo iti nasao nga ili nangruna kadagiti ubbing ken natataengan gapu iti kinatapok ti kalsada iti lugarda.
Segun ken ni Mr. Joselito “Jojo” Pidlaoan, nabayagen a pakaseknan dagiti residente ti tapok iti lugarda tunggal adda ti dumalyasat a lugan ti quarry operation.
Nupay kasta, kalikagom ti nasao nga ahensia ti makikoordinar kadagiti sumagmamano nga ahensia ti lokal a gobierno tapno masolusyonan ti nasao a banag.
Basar met ken ni Ms. Jenifer Aprecio, residente iti Brgy. Suyo iti ili ti Dingras a maysa isuna kadagiti nagsakit iti nasao a barangay gapu iti nasao a parikut.
Immunan iti daytoy, kinunana ni Barangay Chairman Amando Taylan Jr., ti nasao a barangay, dakkel a parikot kadagiti kabarangayanna ti natapok a mapaspasaran tunggal adda ti dumalyasat a lugan iti kalsada.
Mainaig iti daytoy, inlawlawag ni Kapitan a nakasaritana metten ti mangimatmaton iti maiwaywayat a quarry operation maipanggep iti nasao a banag.
Nupay kasta, inpalgakna nga agpapan ita a gundaway ket saan pay a nasolbar ti problemada.
Kabayatanna, naammoan nga idi pay tawen 2018 idi nangrugi ti quarry operation.
