LAOAG CITY – Umaboten iti 17 nga indibidual dagiti pimmusay iti narpuog a maipatpatakder a pasdek idiay Angeles City, Pampanga.
Basar iti Bureau of Fire Protection (BFP) Central Luzon, nabirokanda ti maika-16 a bangkay itay alas dos ti parbangon ken kalpasan ti maysa nga oras ket nabirokanda pay ti maysa a bangkay.
Iti agdama, manarimaan ti search, rescue ken retreival operations para iti tallo pay nga indibidual a maipagarup nga adda pay laeng iti uneg ti narpuog a pasdek.
Maipalagip a 27 nga indibidual ti nakalasat iti nasao nga disgrasia a nangitunda ti panagdanag dagiti residente ken otoridad.
Binallaagan met ti Department of the Interior and Local Government (DILG) dagiti lokal a gobierno a bantayanda dagiti pasdek nga maipatpatakder iti lugarda tapno masigurado ti kinatibker ken no addaan dagitoy dagiti kasapulan a clearances.
