LAOAG CITY – Kalikagom dagiti miembro ti Garnaden Multi-Purpose Cooperative iti ili ti Nueva Era a maipasubli ti share capital da kalpasan a nabayagen a nagrikep daytoy.
Segun kenni Mrs. Hermilina Papa, miembro ti nasao a kooperatiba, 2019 pay laeng idi narikep daytoy ngem agpapan ita ket awan pay ti panagsasarita da.
Naamoan a nasurok 200 a miembro ti kooperatiba ken awan pay a pulos ti nakaala ti share capital.
Inbatad na a nabayag nan nga ibagbaga kadagiti opisyal ti kooperatiba a mangikeddeng da ti taripnong tapno malawlawagan daytoy a banag.
Kunana a no adda met ti maikeddeng a petsa ket awan met ti opisyal nga agatendar.
Kabayatanna, kalikagom ita ni Papa a masolbar daytoy a banag ken maisubli kadakuada ti kwarta da.
