LAOAG CITY – Minilyon a pisos ti lugi ti Laoag City General Hospital (LCGH) iti napalabas nga administrasyon ditoy ciudad ti Laoag.
Daytoy ti inbatad ni Mr. Ferdinand Quiroga, ti OIC City Accountant iti gobierno ditoy ciudad ti Laoag kabayatan ti panangipresentar na ti report ti Commission on Audit (COA) idi 2018.
Basar ti report ti COA, idi 2014 ket umabot ti nasurok a 70-milyon a pisos ti lugi ti LCGH; idi 2015 nasurok a 50-milyon; 2016 nasurok a 49-milyon; 2017 nasurok nga 84-milyon ken 2018 nasurok nga 86-milyon a pisos.
Gapu iti daytoy, inrekomendar ti COA a masapol nga irebisar a naimbag ti management ti LCGH ti agdama a pagalagadan mainaig iti operasyon ti nasao nga ospital.
Inbalakad pay ti COA a no kasapulan ket masukatan a dagus ti agdama a pagalagadan tapno mapadakkel ti mapastrek ti LCGH.
