LAOAG CITY – Ballaigi iti naisayangkat a Memorandum of Agreement iti nagbaetan ti Mariano Marcos State University ken National Intelligence Coordinating Agency.
Segun ken ni Dr. Shirley Agrupis, ti Presidente iti nasao nga unibersidad, babaen iti daytoy a ganuat ket manglukat pay ti ad-adu nga oportunidad a pakabenipisiaran dagiti estudiante a makasakdo manen ti baro nga adal.
Inbatadna a dakkel daytoy a tulong para kadagiti agad-adal pakairamanan dagiti dadduma pay nga stakeholders tapno maiyadayo dagitoy a makikappeng iti makakannigid a grupo.
Mangnamnama ni Dr. Agrupis nga agbalin a naan-anay a natalged ken maipaayan ti naig-iget a seguridad dagiti tunggal agad-adal iti nadakamat nga unibersidad.
Mainaig iti daytoy, kuna ni Mrs. Mildred Abordo, ti Director iti National Intelligence Coordinating Agency, adda ti pammilin kadakuada nga agturong kadagiti amin a sektor iti komunidad tapno maipadanon ti pannakaitandudo ti impormasion maipapan iti communist terrorist group.
Inlawlawagna a kalikagumda a mapagtalinaed ti peace and order iti lugar nangruna ket maibilang nga insurgency free ti probinsia pakairamanan iti intero a rehion uno.
Innayonna a masirsirmatana ti nakapia ken naannayas a panagbiag dagiti umili babaen iti panagkikinnammayet dagiti amin a maseknan nga indibidual ken grupo tapno magun-od ti naragsak a komunidad.
