LAOAG CITY – Nagdinnungpar ti maysa a motorsiklo ken pick-up iti Brgy. 13 Nra. Sra. De Visitacion ditoy siudad ti Laoag.
Ti driver ti motorsiklo nga Honda WinnerX ket agtawen ti 42 ken residente ti Brgy. 29 Pasiocan iti ili ti Bacarra idinto a ti nangiturong met ti pick-up a Ford Ranger ket agtawen ti 47 a residente ti Brgy. 13 Nra. Sra. De ditoy siudad ti Laoag.
Basar iti Laoag City Police Station, kabayatan a dumaldalyasat dagiti dua a lugan nga agpada nga apa-amianan ket nagsardeng ti pick up tapno mapan ag-parking iti asideg ti pagtaenganda ngem nadungpar daytoy ti nakamotorsiklo.
Gapu iti daytoy, nagsagaba ti sugat iti nagduduma a paset ti bagina ti driver ti motorsiklo a dagus a naitaray iti Gov. Roque B. Ablan Sr. Memorial Hospital para iti pannakatamingna idinto a saan a naan-ano ti nangiturong iti pick up.
