LAOAG CITY – Naragsak a nagawid ditoy probinsya ni Mr. Allan Alipio, maysa a mangisursuro idiay Chinchilla Christian College, Chinchilla Queensland, Australia ken taga ciudad ti Batac kalpasan a napadayawan kas Most Outstanding Science Teacher iti nasao a pagilyan.
Daytoy ket babaen kadagiti tallo nga ahensya ti gobierno ti Australia kas iti CSIRO, Australian Science Teachers Association ken BHP Foundation.
Segun kenni Alipio, maysa daytoy a pribilehiyo gapo ta isuna ti kaunaan a Pilipino a nabigbig iti kangatoan a pammadayaw iti nadakamat a pagilyan.
Inlawlawag na nga ummuna a napili kas mangibagi ti western Australia ken kinalaban na amin dagiti pannakabagi dagiti dadduma pay nga estado.
Inbatad na a babaen iti panangtingiting dagiti nasao nga ahensya kadagiti naaramidan dagiti finalist ket isuna ti napadawayan kas Most Oustanding Teacher.
Karaman kadagiti criteria ket ti kalidad ti panangisuro, epekto na daytoy kadagiti estudyante da ken no anya a programa ti iyem-emplementar da iti pagadalan.
Inlawlawag na a ti gagem na ket mangisuro wenno agbalin a coach kadagiti ubbing a makilaban kadagiti nagduduma a science and engineering competitions.
Inlawlawag na a naawat na daytoy a pammadayaw idi mangisursuro pay laeng isuna iti Christian Aboriginal Parent Directed School, Coolgardie West iti nasao a pagilyan.
Naamoan a sakbay a nangisuro idiay Australia ni Alipio ket nagserbi pay kas science teacher idiay Bahamas, China, Japan, ken Amerika.
Ni Alipio ket nagturpos iti Mariano Marcos State University (MMSU) College of Teacher Education ditoy ciudad ti Laoag iti kurso a Bachelor of Arts, Bachelor of Science and Bachelor in Secondary Education.
Innayon na a kanayon na a panpanunuten ti balakad dagiti nagannak kenkuana a ti panagbasa a nalaing ken ti panagtalek iti Diyos ti wagas tapno umasenso ti panagbiag na.
