LAOAG CITY – Nagreklamo ni Ms. Nida Menor, residente ti Brgy. Gabu Norte, maipanggep iti isyu ti lote a maipagarup nga adda ti maysa nga indibidual a nangipatakder ti pagtaengan iti loteda ditoy siudad ti Laoag.
Binigbigna daytoy a ni Alvaro Raquino, residente met laeng iti nasao a lugar ngem agdama nga agnanaed iti Hawaii.
Segun kenkuana, adda dagiti dokumentoda a mangpaneknek a kukuada ti lote a pangitaktakderan ni Raquino ti pagtaengan.
Gapu iti daytoy, kiniddaw ni Menor a mangipaay ti dokumento wenno katulagan dagiti nagannakda ken ni Raquino a mangpaneknek a kukuada ti pangipapatakderanda a balay.
Nupay kasta, nagkedked ni Raquino a mangipakita ti dokumento a mangipaneknek a kukua da ti lote idinto nga inpettengna a ti laeng korten ti pangikataanda.
Mainaig iti daytoy, kiniddaw ni Menor nga ipasardeng ti konstruksyon ti pagtaengan a ipapatakder ni Raquino agingga a mapaneknekan a kukuada daytoy.
Innayonna a ti nakainaganan ti lote ket ni Fredo Gabriel, a lolong ti stepfather-na idinto a saanda pulos a kabagian ni Raquino ken isuna ti agbaybayad ti amilyar.
Naammoan a mannarimaan ti pannakaproseso ti building permit ti pagtaengan nga ipapatakder ni Raquino.
