LAOAG CITY – Irekreklamo ti sumagmamano a residente iti Barangay Nalbo ditoy siudad ti Laoag ti nabangsit a basura iti Ekhikaia Seafood Restaurant.
Segun ken ni Ms. Jahnese Matanguihan, maysa kadagiti maap-apektaran a residente iti nasao a barangay, uray la ag-vomit dagiti makaangot nga ubbing a kabbalayda ti kinabasingsit ti pagbasuraan iti nasao a restaurant.
Inbatadna a maam-amak pay daytoy no malang-ab ti kaipaspasngayna a maladaga nga innem a bulan pay laeng ti nabangsit a pagbasuraan aglalo no napigsa ti pul-oy ti angin.
Inlawlawagna nga in-report-da met daytoyen a reklamo iti barangay no sadinno a mismo dagiti opisial ti barangay ti nakaangot ti nabangsit a pagbasuraan ti nasao a seafood restaurant.
Kunana a namin-adu a daras a naipakaammo daytoy a banag iti nasao a restaurant ngem arig saanda met nga ikankano iti pannakasolbar ti mairekreklamo kadakuada.
Nupay kasta, inpetteng dagiti staff ti seafood restaurant a gabgaburanda met ti darat ti abut a pangikabkabilanda kadagiti food waste ti seafood restaurant-da.
Mainaig iti daytoy, inpakaammo ni Atty. Charito Malicad, mangidadaulo ti Business and Permit and Licensing Office ditoy siudad ti Laoag a saan pay a naka-renew ti business permit ti Ekhikaia Seafood Restaurant.
Inpasingkedna nga uray awan pay ti pormal a reklamo kontra iti nasao a seafood restaurant ket rumbeng laeng a kitaenda daytoy a banag kaduada ti City Health Office.
Kabayatanna, naiget a naglikudan ti maseknan a seafood restaurant ti mairekreklamo kadakuada.
Immuna iti daytoy, nakaawat ti reklamo ti Bombo Radyo Laoag babaen ti ipa-Bombo segment manipud kadagiti sumagmamano a residente iti Barangay Nalbo ditoy siudad ti Laoag gapu iti maipagarup a nabangsit a basura ti Ekhikaia Seafood Restaurant.
