LAOAG CITY – Mausar ti nabatbati a pundo ti Republic Act No. 7171 iti ili ti San Nicolas kadagiti proyekto imprastraktura.
Segun ken ni Mayor Mike Hernando iti nasao nga ili, manipud iti 38 a milyon a pisos ket addan ti 16 a milyon a pisos ti nausaren iti pananggatang kadagiti nagduduma a farm machineries ken agricultural equipment a naibunong kadagiti nagduduma nga asosasion dagiti mannalon iti ili ti San Nicolas.
Inbatadna a ti nasao a pundo ket bingay pay laeng iti lokal a gobierno idi tawen 2022.
Kunana a babaen iti daytoy ket dakkel a tulong a pakanam-ayan dagiti maseknan a mannalon tapno adda ti mausarda iti panagtalonda.
Inlawlawagna a maysa kadagiti kangrunaan a ramit nga inbunongda ket ti hose a dakkel a katulungan para kadagiti mannalon iti panagpadanum dagitoy iti kataltalonanda.
Innayonna nga iti ili ti San Nicolas ti kangrunaan a Local Government Unit ditoy probinsia a nangirugi a mairekord amin dagiti maipapaay nga agricultural inputs tapno mamonitor a nasayaat ti pannakausar dagitoy.
