LAOAG CITY – Nakaruaren iti pagilian ti mapapati nga ina ni Bamban, Tarlac Mayor Alice Guo ken pakairamanan ti maitudtudo nga ama daytoy a ni Guo Jang Jong, segun ken ni Sen. Sherwin Gatchalian.
Gapu iti daytoy, inbatad ni Gatchalian nga adayon a mapasamak ti karitna ken ni Mayor Guo a dumalan iti DNA test ken ti mapagat-atapan nga inana a ni Lin Wen Yi gapu ta awanen ditoy Pilipinas.
Ti maibagbaga a nagannak ni Mayor Guo ket agpada a Chinese isu nga aniaman nga oras ket mabalinda nga agsubli iti pagilianda ken saanen a pulos nga agpakita ditoy Pilipinas.
Kunana a basar iti records ket rumrummuar iti Pilipinas dagiti nadakamat a nagannak ni Guo iti maysa a daras iti maysa a bulan.
Maipalagip a simmango ni Guo iti Senado, inpettengna a maysa a Filipina ti inana nga agnagan ti Amelia Leal a maipagarup a dati a katulong ti amana.
Nupay kasta, kuna ni Gatchalian, mabalin a mapaneknekan dagiti residente ti Valenzuela a ni Lin Wen Yi ti dinakamatna kas ina ti Mayor no sadino ti pamiliada ket agnanaed iti siudad.
Inbatadna a no mapaneknekan nga agpada a Chinese nationals dagiti nagannak ni Guo ket awan ti karebbenganna nga agpaidasig ken agserbi iti aniaman nga elective position iti gobierno.
Kabayatanna, nagpakita ti dati a Consultant ni Mayor Alice Guo tapno ilaban ti dagiti a kliyentena kontra kadagiti personal a panangkuestionar iti opisial.
Kuna ni Nancy Gamo, dagiti saludsod ket maisalungasing kadagiti karebbengan ti Mayor kas maysa nga indibidual ken maysa nga opisial. Ni Gamo, maysa nga accountant, ket personal a naam-ammona ni Mayor Guo sipod idi 2012.
Inlawlawag ni Gamo, saan daytoy a nagbalin nga empleado wenno full-time nga Accountant ni Mayor Guo no di ket timmulong daytoy kadagiti nagduduma nga aspeto ti negosio ken personal a biag ti Mayor pakairamanan ditoy ti panagbalin a corporate housekeeping ken panangiplastar kadagiti records; panangaramid ti due diligence iti panaggatang ti daga ken panangproseso ti eCAR; panangaramid kadagiti dokumento idi Disiembre 2015 kas ti Memorandum of Agreement, Deed of Transfer ken Assignment of Shares para iti panaglako kadagiti shares ti pamilia Guo.
Malaksid iti daytoy, ti panagtulong pay kadagiti adda iti babaen ni Guo iti opisina iti panagaramid ti sungbat kadagiti surat manipod iti Local Government Unit ken dadduma pay nga ahensia ti gobierno ken panangipaay ti abiso kadagiti isyu iti farm ken dadduma pay nga accounting ken realty.
Nupay man saan a pormal a nakaadal, maipagarup met a sinursuroan ni Teacher Rubylin ni Guo ken alisto isuna a nakasursuro ken nalaing a negosiante iti baet ti kinaubingna.
Kabayatanna, naam-ammo pay ni Gamo ni Lin Wen Yi, a naiyam-ammo kas partner ti ama ni Mayor Alice. Kuna ni Gamo a saan a ni Lin Wen Yi ti pudno nga ina ni Mayor Alice ken saanen a nasken pay a gutiguten dagiti dadduma a tao tapno dumalan iti DNA test.
