LAOAG CITY – Inpakaammo ni Mr. Christopher King Medina, Disability Officer 4 ti Person’s With Disability Affairs Office ditoy siudad ti Laoag nga adda ti maisayangkat a nagduduma nga aktibidad para kadagiti Person’s With Disability wenno dagiti adda ti rangkap ti bagina ita a bulan ti Hulio.
Segun kenkuana, maiyuswat ti art exhibit ita nga aldaw agingga inton Hulio 15 iti SM a pakaitampokan dagiti aramid mismo dagiti ubbing nga adda ti rangkap ti bagina.
Inbatadna nga adda ti skills training dagiti adda ti rangkap ti bagina inton Hulio 14 ken 15 maipanggep iti massage, manicure ken pedicure nga idauloan ti Technical Education and Skills Development Authority.
Kunana nga adda ti free medical mission inton Hulio 16 iti Laoag City Hall nga idauloan ti City Health Office ken Laoag City General Hospital.
Inlawlawagna a saan a tubeng ti adda ti rangkap ti bagina gapu ta adda ti maisayangkat a PWD Got Talent inton Hulio 17 iti SM a pakabuyaan dagiti nagduduma a talento dagiti Person’s With Disability.
Mainaig iti daytoy, kuna ni Medina a maangay ti anibersario ti Laoag City Federation of PWDs inton Hulio 18 a maysa nga orgaisasion a mangkitkita ti pagsayaatan dagiti adda ti rangkap ti bagina.
Inpasingkedna nga adda pay ti maiyuswat a seminar maipanggep iti linteg inton Hulio 24 babaen ti Integrated Bar of the Philippines – Ilocos Norte Chapter.
Innayonna nga adda ti maisayangkat a computer literacy training inton Hulio 30 ken 31 nga idauloan ti Department of Information and Communications Technology.
