LAOAG CITY – Naaprobaran iti Sangguniang Panlungsod ditoy suidad ti Laoag ti ordinansa nga Access to Better Livelihood and Employment for Persons with Disability (ABLE PWD) a mangpapigsa iti pannakaiturong ti trabaho ken panagbiag dagiti persons with disability (PWDs) ditoy siudad.
Segun kenni konsehal John Michael V. Fariñas, Committee Chair ti Family Welfare, Women, and Children, a daytoy nga ordinansa ket ti panangpapigsa iti naipatakder a national law babaen iti job matching, employment facilitation ken employer engagement.
Kunana a daytoy ket nagtinnulongan ti Persons with Disability Affairs Office (PDAO) ken Public Employment Service Office (PESO) mangisagana kadagiti PWD iti umiso a trabaho a maiyannatop iti kabaelanda ken adalda a kinalaing.
Inalawlawagna a palagipanda dagiti employer iti insentibo a maipaay iti national law, kas iti tax incentives, tapno maallukoyda a mangipaay iti pagtrabahuan para kadagiti kwalipikado a PWD.
Kabayatanna, inbatad ni Konsehal Fariñas a nupay naaprobaran iti Konseho iti Laoag ti nasao nga ordinansa, ket masapul pay a maipan iti pannakarepaso ken pannakaaprobar iti Sangguniang Panlalawigan sakbay a maipatungpal ditoy siudad.
