LAOAG CITY – Immapela ni Mrs. Jostila Pedro iti Barangay 29 ditoy ciudad ti Laoag a maiyakar koma ti pakaikalian dagiti taraken da a baboy.
Maipalagip a sumagmamano a taraken a baboy iti nasao a barangay ket napapatay ken naikali kalpasan nga adda ti pimmusay a baboy iti lugar nga apektado ti African Swine Fever (ASF) virus.
Inbatad ni Pedro a kalpasan ti sumagmamano nga aldaw a pannakaikali dagiti taraken da a baboy iti asideg met laeng ti kulungan da ket agangoten dagitoy.
Inpetteng na a malaksid iti possible a pannaka-apektar ti salun-at da gapu iti nabangsit a maang-angot da manipod kadagiti naikali a baboy, possible a maapektaran pay ti kulukol da a pagal-alaan da ti inumen da.
Kabayatanna, inlawlawag ni Shiela Opelac iti City Agriculture Office ditoy ciudad ti Laoag a tallo a metro ti kauneg na laeng ti nangikalian da kadagiti baboy iti nasao a barangay gapu ta no naun-uneg ket dakkel ti posibilidad na nga agubbog ti daga.
Innayon na a saan da a mabalin nga iruwar iti uneg ti 500 meter radius manipod iti naggapoan dagiti baboy nga apektado ti ASF virus gapu ta possible a makaapektar iti sabali manen a dingwen.
