LAOAG CITY – Inpasingked ni P/Maj. Jephre Taccad, Chief ti Provincial Operation Management Unit ti Ilocos Norte Police Provincial Office a naka-full alert status ti kapulisan para iti mapaspasangasangan a fiesta ti minatay.
Segun kenkuana, naiget ti panangmonitor dagiti kameng ti pulisia kadagiti kamposanto kadagiti nagduduma nga ili ke siudad ditoy probinsia babaen kadagiti augmentation force tapno mapagtalined ti linak, urnos ken talna.
Inbatadna nga agbalin nga isktrikto ti panangkita dagiti pulis kadagiti rummuar ken sumrek kadagiti kamposanto gapu ta saanton a mabalin a maipalubos nga iserrek dagiti cleaning materials wenno dagiti ramit a pangdalus kadagiti tanem.
Kunana a saanda nga agpangadua a kumpiskaren dagiti deadly weapons wenno dagiti natatadem a banag nga itugot dagiti agturong kadagiti kamposanto tapno maliklikan ti aniaman a saan a napintas a mapasamak.
Inlawlawagna dagiti naiget a maipawil nga itugot ken iserrek iti kamposanto ket ti arak, natatagari a banag kas ti speaker ken rechargeale radio ken playing cards wenno aniaman a klase ti gambling paraphernalia.
Kabayatanna, immapela ti Chief ti Provincial Operation Management Unit ti Ilocos Norte Police Provincial Office kadagiti akin-taraken kadagiti ayup a nakawayway kadagiti kamposanto a siguradoenda a saan a makaperwisio dagitoy kadagiti bumisita kadagiti tanem dagiti ay-ayatenda iti biag a pimmusayen.
