LAOAG CITY – Linawlawagan ni Sang Kabataan (SK) Federated President Angelo Agustin iti ili ti Solsona ti isyu kontra iti nakoronaan kas Miss Solsona 2025 a ni Miss Princess Jerinne Aquino a nangibagi iti Barangay Santiago iti nasao nga ili.
Immuna iti daytoy, ado dagiti mangkwes-kwestyunar iti panangabak ni Miss Solsona gapu ta maipagarop a saan a pudno a residente iti nadakamat nga ili.
Adda pay dagiti rimuar nga alegasyon nga immuna a naited dagiti question ken ni Miss Solsona sakbay kadagiti dadduma a kandidata.
Segun ken ni Agustin, adda ti nabayagen a pagannurutan iti ili ti Solsona para iti nasao a beauty pageant no sadinno a saan a napateg no agnanaed iti mismo nga ili ti kandidata laketdi naipasngay iti lugar dagiti nagannak na ket kwalipikadon iti kompetisyon.
Naamoan a ni Miss Solsona ken ti pamilya na ket residente da iti Barangay 24 ditoy ciudad ti Laoag.
Nupay kasta, kinumpirmaran ni Agustin a ti ina ni Miss Solsona ket naipasngay iti ili ti Solsona ngem agdama nga Overseas Filipino Worker (OFW) idiay Hongkong isut gapuna a kwalipikado ti balasang iti naisayangkat a beauty pageant.
Inbutaktak pay ni Agustin nga idi paylaeng manarimaan ti panag-practice dagiti kandidata para iti Miss Gameng Festival ket adon dagiti agrirriri gapu ta patien da a napigsa a kalaban ni Miss Aquino.
Kabayatanna, naglikudan met ni Agustin ti alegasyon nga immuna a naited ti questions ken ni Miss Aquino sakbay kadagiti dadduma.
Inpetteng na a no kayatna koma a switiken ti nasao a kompetisyon ket nawaya a nangaramid tapno laeng nangabak ti kandidata iti mismo a barangay da.
Mainaig iti daytoy, inbalakad ni Agustin a sakbay a mangipaay ti negatibo a reaksyon iti isyu ket amwen koma paylaeng nga umuna dagiti maseknan tapno maliklikan nga adda ti mapasaktan da.
