LAOAG CITY – Napudno a panagserbi para iti pagtalgedan ken naan-anay a kinalinak ti pagilian.

Daytoy ti kiniddaw ni Presidente Ferdinand Marcos Jr. kadagiti nagturpos iti Philippine Military Academy partikular iti 2023 CLASS MADASIGON wenno Mandirigmang may Dangal Simbolo ng Galing at Pagbangon kageddan iti panangipadanon na ti panangablaaw na kadagitoy.

Iti panagbitla ni Marcos kas guest of honor and speaker iti naiyuswat a closing exercises idiay Baguio City, kuna na sumangon dagiti baro a kameng ti armada ti pagilian iti pudn a lubong iti ruar ti academy.

Inbatad na a ti pudno a gubat para kadagitoy ket ti panangprotehir iti pagilian manipod iti nagduduma a pasamak a makaitunda iti pannakadadael ti linak ken talna iti Pilipinas.  

Kuna na a daytoy ket pakairamanan ti pananglaban ti insurhensiya, terorismo ken dadduma pay a krimen.

Immuna iti daytoy, inbunannag ni Marcos a nagasat dagiti baro a nakapagturpos iti Philippine Military Academy gapu ta dagus a karaman dagitoy iti modernization program ti Armed Forces of the Philippines wenno ti naan-anay a pannakaited ti suporta ken proteksyon kadagiti kameng ti armada.

Daytoy ket kas naipalaon naamyendaran ken pinirmaan na nga RA 11709 nu sadino a kalikagum nga ad-adda a mapapigsa ti professionalization ken merit system iti armada.

Kabayatanna, inpetteng ti presidente a ti panagturpos dagiti 310 a baro miembro ti armada ti pagilian ket saan laeng a para kadakuada ngem naisagot para kadagiti nagannak, ay-ayaten a pamilia, kakadua iti academy ken amin nga adda iti likudan ti panagballigi da.

Ti Class valedictorian ken cum laude iti CLASS MADASIGON ket ni Cadet First Class Warren Leonor manipod iti Lipa Batangas ken anak ti dati a soldado met laeng ti aif force.

Kabayatanna, Class Salutatorian ni Cadet First Class Edmundo Logronio iti Manito, Albay; maikatlo ni Cadet First Class Nicole Sarmiento iti Butuan City; maikapat ni Cadet First Class Zhen Zhen Cayton iti Dupax del Norte, Nueva Vizcaya; Rank 5 ni Cadet First Class Rez Mark Cantor iti Bugallon, Pangasinan; Rank 6 ni Cadet First Class Rojan Macario iti Talon-Talon, Zamboanga City; Rank 7 ni Cadet First Class Samuel Banac manipod iti West Fairview, Quezon City; Rank 8 ni Cadet First Class Kimberly Lawingan iti Sadanga, Mountain Province; Rank 9 ni Cadet First Class Rico Jay Fernandez manipod Molave, Zamboanga del Sur ken Rank 10 ni Cadet First Class Arla Krish Bahingawan iti Kiangan, Ifugao.

Nakaawat ni Leonor a top graduate ti Presidential Saber, PAF Saber ken 13 a dadduma pay a plaque ken pammadayaw  plaques pakairamanan ti cum laude recognition na.

Manipod met kadagiti 310 a nagturpos iti Philippine Military Academy ita a tawen ket 239 dagiti lallaki idinto a 72 dagiti babbai.