LAOAG CITY – “Nataltalged ti Pilipinas ita.“
Daytoy ti inrakurak ni Philippine National Police Public Information Office (PNP-PIO) Chief Police Col. Allen Rae Co kalpasan a nasaludsod isuna a no natalged pay kadi ti Pilipinas kalpasan dagiti nagsasaruno a krimen a napasaran ti pagilian kadagiti naglabas a lawas.
Nadakamat nga adda dagiti report ti pammapatay iti dua a motorcycle taxi riders ita a lawas.
Kagidda pay daytoy ti viral photo ti maysa a rider nga adda ti nakasurat a pammalagip iti likud ti helmet-na a mangibagbaga a saanda koma a dangran isuna.
Kuna ni Co a maawatan ti nailian a pulisia ti arapaap ti tunggal maysa a kayatda laeng nga agbiag ti nakappia.
Inlawlawagna a basar iti statistics ket nataltalged ti Pilipinas ita maidasig idi ken ti makitkita laeng dagiti umili ket dagiti sensational a videos iti social media.
Kabayatanna, inpakaammo ni Co a paig-igetan ti Philippine National Police ti koordinasion kadagiti motorcycle apps tapno maprotektaran ti seguridad saan laeng dagiti pasahero no diket pakairamanan dagiti riders daytoy.
Mainaig iti daytoy, gutgutigoten ti Philippine National Police ti publiko a tumawag iti 911 ken ipakaammo dagiti insidente kadagiti kapulisan para iti al-alisto a panagresponde gapu ta ti kasapulan ti ahensia ket ti pannakikammayet ti komunidad tapno maipatungpal daytoy.
