LAOAG CITY – Umabot iti 500 a biktima ti “war on-drugs” ni dati a Presidente Rodrigo Duterte a nagkiddaw nga iparehistro dagitoy iti International Criminal Court (ICC).
Basar iti uppat a panid nga inparuk-at ti International Criminal Court Registry, nakaawat ti International Criminal Court Pre-Trial Chamber 1 dagiti nayon nga aplikante.
Naisubmitirdan iti Chamber 227 ti aplikasion nga umabot iti 500 a biktima.
Idi Enero 28, 2026 ket inbilin ti Chamber ti Victim Participation and Reparations Section ti Registry nga isubmitir daytoy nga agingga iti Pebrero 9.
Nangiparuk-at ti Chamber idi Enero 26 ti desision a mangipalubos iti pannakipaset iti kaso ti agarup 39 a biktima.
Inlawlawag iti desision a dagiti biktima ti murder ken attempted murders a nagun-od manipud idi Nobiembre 1, 2011 agingga iti Enero 30, 2016 idiay Davao City ken pakairamanan dagiti biktima ti murder a napasamak idi Enero 2016 agingga iti Marso 2019 ditoy pagilian ket sakupen latta iti kaso ti dati a Presidente.
Maipalagip nga idi Pebrero 10 ket inbilin ti Chamber ti depensa ken prosecution a mangipasa ti updated a listaan ti ebidensia a maipasa ita nga aldaw, Pebrero 13.
Immunan a nakairekord ti gobierno ti 6,200 a drug suspect ti napapatay idi panawen ni Duterte kas Presidente iti anti-drug war daytoy.
Nupay kasta, maisupadi daytoy iti listaan ti Human rights organization nga adda ti sumurok 30 a ribu nga indibidual ti natay.
