LAOAG CITY – Kinumpirmaran ti National Bureau of Investigation a tingtingitingenda dagiti sumagmamano a flood control projects iti siudad ti Taguig.
Iti maysa nga interview, inbatad ni National Bureau of Investigation Direktor Atty. Melvin Matibag a manarimaan ti panangimbestigarda mainaig kadagiti anomalia ti flood control ti nadakamat a lugar.
Segun kenkuana, adda iti 11 a proyekto idi tawen 2022 iti lugarda Senador Alan Peter Cayetano a maipagarup adda iti anomaliana.
Iti baet daytoy, inpetteng ni Dir. Matibag dagiti mangsuhestion mainaig ti “timing” ti imbestigasion, inpanagetgetna nga immuna daytoyen a dinakamat ni Sen. Panfilo ‘Ping’ Lacson.
Maipalagip a ni Senador Ping Lacson ti immuna a nangiwaras ti nadakamat nga alegasion kalpasan ti panangakusar ni Sen. Alan Peter Cayetano kenkuana a basar iti Statement of Assets, Liabilities and Networth ni senator Ping idi napalabas a tawen ket dimmoble ti ‘net worth-na’.
Kabayatanna naglikudan ni Senador Alan Peter Cayetano ti maipagarup a ghost flood control projects iti Taguig City ken kinaritna dagiti adda iti kameng ti National Bureau of Investigation a saan laeng a tutukan ti lugar ti Taguig no diketdi nasken a maimbestigaran dagiti amin a lugar ti pagilian.
