LAOAG CITY – Immapela ni Nigerian President Bola Tinubu kadagiti protesters nga isardeng dan ti nadara a tignay protesta gapu iti kinangina ti magatgatang ken serbisyo iti nadakamat a pagilyan.
Maipalagip nga addan ti pito a tattao ti natay ken nasurok a 700 dagiti natiliw sipud naiyuswat ti nationwide rally iti intero a Nigeria.
Naamoan a plano dagiti demonstrador ti mangiyuswat ti tignay protesta iti uneg ti 10 nga aldaw.
Iti panagbitla ni Presidente Tinubo, inbatad na a nalawag a mangmangngeg na ti arungaing ti umili kangrunaan na dagiti agtutubo, kagiddan ti panangibaga na a maawatan na ti pannakadismaya ken sakit a marikrikna da.
Nupay kasta, saan a nadakamat ti presidente no baliwan na ti immunan nga inpatungpal na a pagalagadan seknan iti daytoy a banag.
