LAOAG CITY – Naiget nga ipatpatungpal dagiti otoridad idiay Paris, France ti “no QR code, no entry policy” ken ti “color coding” iti Seine River a pakaangayan ti opening ceremony ti 2024 Paris Olympics.
Segun ken ni Bombo International News Correspondent – Jojo Ballesteros, ti pannakaipatungpal ti linteg ket agingga nga agngudo ti 2024 Paris Olympics, inton Agosto 11 tapno masigurado ti kinatalged dagiti atleta kabayatan ti aktibidad.
Inlawlawagna a ti color coding ket isu ti basaran da para kadagiti mabalin a sumrek iti bisinidad ken no awan ti ticket ket saan da nga ipalubos a makastrek iti venue.
Kunana a no awan ti QR code ket saan a mabalin a dumanon iti perimeter ti kulay gray no sadinno nga agingga laeng iti kulay red ti mabalin a papanan ti maysa nga indibidual.
Inpakaammu pay ni Ballesteros nga awan ti aniaman a lugan a makastrek iti competition area.
Mainaig iti daytoy, kunana nga ti siasinno man nga aglabsing iti pagannurotan ket mapatawan ti umannatop a pannusa.
Kinumpirmaran pay ni Ballesteros a nakasaganan dagiti health facilities ti France para iti 2024 Paris Olympics.
Kabayatanna, naammuan nga inton opening ceremony ket aglugan dagiti atleta iti bangka, aglayag iti mismo Seine River.
