LAOAG CITY – Posible nga ipasubli ti Commission on Audit (COA) ti P612.5 million a confidential funds ni Vice President Sara Duterte.
Iti impeachment trial ket inbatad ni Commission on Audit state auditor Xylene del Campo a mabalin nga i-disallow ti ahensia ti sibubukel a confidential funds ti Office of the Vice President (OVP) ken iti Department of Education (DepEd).
Dinakamat ni Senate President Win Gatchalian nga immuna nga inrakurak ni del Campo nga addaan ti notice of disallowance (NDA) ti Commission on Audit mainaig iti P375 million a confidential funds ti Office of the Vice President idi umuna a tallo a quarters ti 2023 kalpasan nga inpaay ti dati nga special disbursing officer a ni Gina Acosta ti pundo iti head ti security ti Bise Presidente a ni Col. Raymund Dante Lachica a maikanniwas iti babaen ti Joint Circular 2015-01.
Naammoan a no naisyuan ti notice of disallowance, kayatna a saoen, adda ti nakita ti Commission on Audit nga iregular iti panagusar ti confidential funds ken kasapulan nga isubli ti kuarta iti gobierno.
Kwinestionaran ni Gatchalian no apay nga iti Department of Education ket awan ti notice of disallowance iti baet a ti nagbalin a panagdengngeg iti Kamara de Representantes ket inadmitir ti dati a disbursing officer ti Department of Education a ni Edward Fajardange intedna met ti confidential funds idi 2023 iti security officer ti ahensia a ni Col. Dennis Nolasco.
Kuna met ni del Campo a gapu iti baro nga impormasion ket posible a balbaliwan ti credit notice nga immuna nga inyisyu iti Department of Education gapu ta saanda nga ammo nga inpaay ti SDO iti dadduma ti pundo.
