LAOAG CITY – Dakkel a makatulong ti Palay Buying Rice Trading Project ti lokal a gobierno ditoy siudad ti Laoag kadagiti umili.
Segun ken ni Engr. Shiela Opelac, City Agriculturist, nabukelda ti nasao a proyekto kalpasan a saan a tinungpal ti National Irrigation Administration ti kiniddawna a 100 a sako ti Bagong Bayaning Magsasaka wenno BBM Rice tapno mailako iti Kadiwa Store iti sangoanan ti City Hall.
Inbatadna a daytoy ket nairanta para kadagiti umili nga agkalikagum a gumatang ti nalaka a presio ti bagas ngem napintas ti kalidadna.
Kunana a babaen iti daytoy a programa ket matulungan pay dagitoy nga agbalin nga entrepreneurs.
Inlawlawagna nga adda ti pundo ti City Agricuture Office tapno usarenda a paggatang ti irik kadagiti barbarangay.
Innayonna a magatang ti nasao a bagas ti 50 a pisos iti kada kilo ngem limitado laeng.
