LAOAG CITY – “Arig maysa a forum.”
Daytoy ti inbatad ni Senador Erwin Tulfo mainaig iti panagdengngeg ti Senado nga indauloan ni Senador Rodante Marcoleta iti plenario idi Hunio 4.
Segun kenkuana, saan a nairekord ti nasao a sesyon isu a saan a karaman daytoy ti opisial a proseso ti Senado.
Inbatadna nga ad-adda nga agatendar dagiti umno nga opisial ti panagdengngeg ti Blue Ribbon Committee a naikeddeng a maiwayat inton Lunes, Hunio 8.
Ti nasao a panagdengngeg inton Lunes ket mapaayaban manen dagiti 18 a dati a miembro ti Philippine Marines tapno sungbatan dagiti saludsod a saan a nasaludsod idi naudi a forum karaman daytoy iti mainaig kada Senadora Loren Legarda ken Senador Mark Villar a basar iti affidavit-da ket adda nagan dagitoy ngem saan a nadakamat ti naganda kadagiti testimonia.
Basar iti nasao a forum, maipagarup adda ti naited a naka-maleta a kuarta kada Tulfo ken ni dati a Senate President Vicente “Tito” Sotto III.
Insigida met a naglikudan ti dua a Senador ti alegasion kontra kenkuada ken inawaganda a dakkel nga ulbod ken planado a propaganda daytoy.
