LAOAG CITY – Saan a rumbeng nga iyaleng-aleng ti aniaman a panagsaksakit ti tultulang a mabalin a senyales ti nakarkaro a kondisyon kas ti bone cancer.
Segun ken ni Dr. Wilsky Delfin, ti Natural health/herbalist consultant, adda ti dua a klase ti bone cancer, dagitoy ket ti primary bone cancer a mangrugi a mismo iti tulang ken maibilang a manmano laeng ti kastoy a kaso, ken ti secondary bone cancer a mangrugi met iti sabali a klase ti cancer kas ti breast, prostate, lung, kidney, ken thyroid cancer nga agwaras iti tulang.
Inbatad ni Delfin a saan a dagus nga ikonektar iti cancer ti panagsaksakit ti tulang gapu ta mabalin a gapu daytoy ii sabali a kondisyon kas ti osteoporosis, isut gapuna a napateg ti umiso a panangtingiting ken panagpakonsultar iti doktor sakbay nga agaramid iti aniaman nga addang wenno panagagas.
Karaman kadagiti sintomas a masapol a bantayan ti agtultuloy a panagsaksakit ti tulang aglalo iti rabii, kaadda ti bukol wenno panaglitteg dagiti susuup, alisto a pannakabannog, panagkapsot ken alisto ti pannakabullo.
Para iti diagnosis, kuna na a maus-usar ti X-ray, MRI, CT scan, ken bone scan tapno maamoan ti pudno a kondisyon.
Innayon na a napateg ti umiso a nutrisyon, usto a panag-ehersisyo, panaginana ken uminom ti bitamina kas ti calcium ken vitamin D tapno makatulong iti salun-at ti tulang.
