LAOAG CITY – Pimmusay ti maysa a baro kalpasan a nagbekkel iti pagtaenganda iti ili ti Badoc.
Segun ken ni P/Capt. Elison Pasamonte, Hepe ti Badoc Municipal Police Station, nabigbig ti biktima nga agtawen iti 24, awanan asawa ken residente iti nasao nga ili.
Inbatadna a basar iti inwayatda nga imbestigasion, agsapa idi kalman ket apaman nga agturong koma ti uliteg ti biktima iti kataltalonan ket kellaat daytoy a nakigtot kalpasan a nakitana a nakabitin ti kaanakanna babaen ti belt ken tali.
Gapu iti daytoy, kunana a nagpukkaw ti napigsa ti uliteg ti biktima kagiddan ti panangayabna ti kabsatna wenno ti ama mismo ti biktima tapno agpaarayat.
Inpalgakna a timmangkenen ti biktima a nakaparintumeng iti ruar ti pagtaenganda.
Mainaig iti daytoy, inpakaammo ni P/Capt. Pasamonte a basar iti pannakisarsaritana iti pamilia ti biktima nga awan met dagiti madakdakamat ti biktima a sangsangoenna a problema.
Nupay kasta, rumrummuar iti imbestigasion dagiti otoridad a naaramid ti biktima nga agpakamatay gapu ta maipagarup a nagsinada ti nobiana.
