LAOAG CITY – Pinasingkedan ti Journal of Clinical Endocrinology & Metabolism a ti panagbalbaliw ti normal nga oras ti panagriing iti agsapa ket makaitunda iti napeggad nga abnormalidad iti metabolismo ti bagi.
Gapu iti daytoy, umadu met ti posibilidad a mapasaran dagiti sakit wenno kasasaad a mainaig iti metabolismo, kas iti diabetes, sobra a timbang wenno kinalukmeg, ken sakit ti puso.
Sigun iti panagadal a naaramid idiay University of Pennsylvania iti Estados Unidos, dagiti tattao a nasapa a makariing gapu iti trabaho ket mabalin a mangpataud iti panagbalbaliw ti circadian rhythm wenno oras ti panagriing a mangapektar iti normal a panagandar ti metabolismo ti bagi.
Innayonda, daytoy ti maysa kadagiti nadakamat a rason iti panagadu ti bilang dagiti agpaspasar iti diabetes ken sobra ti kinalukmeg.
